Дружна! Разам! Першае месца! Як прайшоў турыстычны злёт у Глуску
Турыстычны злёт у Глуску — гэта не проста спаборніцтва, гэта турыстычна-спартыўна-гастранамічна-культурнае свята. Свята для людзей усіх узростаў, розных прафесій, заняткаў і пасад. Злёт праходзіць два дні, а не забываецца і праз два месяцы. Бо калі ў добрым месцы збіраюцца добрыя людзі дзеля добрай мэты — гэта сапраўды варта добрых і доўгіх успамінаў.
Сяголета раённы турыстычны злёт быў прысвечаны Году міру і стварэння і накіраваны на прапаганду сям’і і іншых нашых традыцыйных каштоўнасцей. Праходзіў 11 і 12 жніўня ва ўрочышчы Лысуха, гэта прыгожае і зручнае месца, здаецца, проста створана для такіх мерапрыемстваў. (Хочацца спадзявацца, што за час злёту прырода не пацярпела.) Удзел у злёце бралі восем каманд: “БНБК-АГРА” (ТАА “БНБК-АГРА Глуск”), “СуперМед” (ЦРБ), “КаМОН” (УКП “Жылкамгас”), “Максімум” (райпо), “Лясны дазор” (лясгас), “Глускія буслы” (аддзел па адукацыі), “Арыён” (установы культуры), “Разам — мы сіла” (Цэнтр па забеспячэнні дзейнасці бюджэтных арганізацый).
У выніку ўсіх спаборніцтваў трэцяе месца ў раённым турыстычным злёце 2023 года заняла каманда “КаМОН” УКП “Жылкамгас”, на другім месцы — каманда “Разам — мы сіла” Цэнтра па забеспячэнні дзейнасці бюджэтных арганізацый, а пераможцам сяголета стала каманда “СуперМед” цэнтральнай раённай бальніцы.